འཁོན་གདུང་སྤྱིའི་ཞབས་བརྟན།
༈ བཀྲ་ཤིས་ཡོན་ཏན་མ་ལུས་འབྱུང་བའི་གནས། །བཀྲ་ཤིས་སེམས་དཔའ་ཆེན་པོ་འཇམ་པའི་དབྱངས། །
བཀྲ་ཤིས་འོད་གསལ་འཆི་མེད་ལས་སྤྲུལ་པའི། །བཀྲ་ཤིས་ལྷ་བབས་གདུང་བརྒྱུད་ཞབས་བརྟན་ཤོག །
དཔལ་འབར་རྒྱལ་བའི་བྱིན་རླབས་འོད་པོ་ཆེ། །དཔལ་འབར་ནུས་མཐུའི་སྣང་བས་འཇིག་རྟེན་གསུམ། །
དཔལ་འབར་མ་རིག་མུན་ལས་རྒྱལ་མཛད་པའི། །དཔལ་འབར་འཁོན་གྱི་གདུང་བརྒྱུད་ཞབས་བརྟན་ཤོག །
འཛམ་གླིང་བྱང་ཕྱོགས་ཐུབ་པའི་རྒྱལ་ཚབ་ཞེས། །འཛམ་གླིང་མཁས་གྲུབ་ཡོངས་ཀྱིས་ཆེར་བསྔགས་པའི། །
འཛམ་གླིང་བསྟན་པའི་བདག་པོ་ས་སྐྱའི་གདུང་། །འཛམ་གླིང་གདུལ་བྱའི་མགོན་དུ་ཞབས་བརྟན་ཤོག །
ཐུབ་བསྟན་མཛེས་རྒྱན་བསྟན་འཛིན་དུ་མ་ལས། །རྒྱན་དྲུག་མཆོག་སོགས་སྐྱེས་ཆེན་དུ་མ་ཞིག །
སྙིགས་དུས་བསྟན་འགྲོའི་མགོན་དུ་འཁོན་གདུང་ཞེས། །རྒྱལ་བས་རྒྱན་དུ་བསྔགས་ཁྱོད་ཞབས་བརྟན་ཤོག །
མཁས་གྲུབ་ཇི་སྙེད་རིམ་བྱོན་ས་སྐྱའི་གདུང་། །ཆད་མེད་མྱུར་དུ་བྱོན་ནས་སྐྱེ་རྒུ་ལ། །
སྲིད་ཞིའི་དཔལ་འབྱོར་རྒྱ་མཚོ་ལེགས་བྱོན་ནས། །ཐར་མཆོག་ཡིད་བཞིན་ནོར་བུ་དེང་འདིར་བྱོན། །
ཅེས་པ་དགེ་བསྙེན་ཀུན་དགའ་རྒྱལ་མཚན་གྱི་ངོར་ས་སྐྱ་པ་ཀུན་བློས་སོ།།
དཀོན་མཆོག་རིན་ཆེན་གསུམ་གྱི་བྱིན་རླབས་དང་། །དཀར་ཕྱོགས་དགའ་བའི་མཐུ་དང་ནུས་པ་ཡིས། །
རྒྱལ་བའི་བསྟན་འཛིན་འཇམ་དབྱངས་ཡབ་སྲས་སོགས། །སྐུ་ཚེ་རིང་ཞིང་ཕྲིན་ལས་རྒྱས་གྱུར་ཅིག །
བླ་མ་སྐུ་ཁམས་བཟང་ལ་གསོལ་བ་འདེབས། །མཆོག་ཏུ་སྐུ་ཚེ་རིང་ལ་གསོལ་བ་འདེབས། །
འཕྲིན་ལས་དར་ཞིང་རྒྱས་ལ་གསོལ་བ་འདེབས། །བླ་མ་འབྲལ་བ་མེད་པར་བྱིན་གྱིས་རློབས། །
སྐུ་བསོད་རི་བོ་བཞིན་དུ་བརྟན་པ་དང་། །བསྟན་འཛིན་ཉི་ཟླ་བཞིན་དུ་གསལ་བ་དང་། །
སྙན་གྲགས་ནམ་མཁའ་ལྟ་བུར་ཁྱབ་པ་ཡིས། །བཀྲ་ཤིས་དེས་ཀྱང་དེར་འདིར་བདེ་ལེགས་ཤོག། །།
Leave a comment