ཡུ་རོབ་དཔལ་ས་སྐྱའི་སྨོན་ལམ། ཉིན་དང་པོ།
ཡུ་རོབ་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ཐེངས་དང་པོ།
ཕྱི་ལོ་ ༢༠༡༩ ཟླ་ ༠༨ ཚེས་ ༠༩ ནས་ ༡༡ བར།
བྷེལ་ཇམ།
རིས་མེད་བསྟན་པའི་བདག་པོ་མཚུངས་མེད་ཆོས་ཀྱི་རྗེ་དཔལ་ས་སྐྱའི་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་དབུ་བཞུགས་ཐོག་ཡུ་རོབ་དཔལ་ས་སྐྱའི་འཇིག་རྟེན་ཞི་བདེ་སྨོན་ལམ་ཆེན་མོ་ཐེངས་དང་པོ་དེ་བཞིན། དེ་རིང་ཡུ་རོབ་ཀྱི་རྒྱལ་ཁབ་བྷེལ་ཇམ་ནང་དུ་དངོས་སུ་དབུ་འཛུགས་གནང་སོང་། 
དེ་རིང་སྔ་དྲོར་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག་གི་དབུས་སྟོན་འཁོར་རྣམ་པ་ཚོགས་ཁང་ནང་ཞབས་སོར་འཁོད་མཚམས་ས་གནས་སྨོན་ལམ་ཚོགས་པའི་རྒྱུན་ལས་རྣམ་པས་འཚམས་འདྲི་དང་། ཚོགས་པའི་བྱུང་རིམ། སྨོན་ལམ་ཚོགས་དགོས་པའི་དམིགས་ཡུལ་དང་རྒྱུ་མཚན་སོགས་བོད་སྐད་དང་། དབྱིན་སྐད། ཧྥ་རན་སིའི་སྐད། ནི་དྷཱ་ལན་ཌིའི་སྐད་བཅས་ཀྱི་ནང་གསུངས་སོང་།
དེ་ཡང་དེ་རིང་གི་ཆོས་ཀྱི་འདུ་འཛོམས་ཆེན་པོ་འདིའི་ཐོག་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་དང་། འཇིགས་མེད་མཁྱེན་བརྩེ་རིན་པོ་ཆེ་རྣམ་གཉིས་ཀྱི་དབུས་བོད་བརྒྱུད་ནང་བསྟན་གྱི་ཆོས་བརྒྱུད་སོ་སོའི་དགེ་འདུན་གྱི་སྡེ་དང་། ཡུ་རོབ་ཀྱི་རྒྱལ་ཁབ་མི་འདྲ་བ་སོ་སོར་གནས་བཞུགས་ཆོས་བྱེད་སེར་སྐྱ་ཕོ་མོ་སོགས་འདོར་ན་འཛམ་གླིང་གི་རྒྱལ་ཁབ་ཁག་སུམ་ཅུ་ཙམ་ནས་ཆེད་དུ་མི་གྲངས་ཆིག་སྟོང་ལྔ་བརྒྱ་ཙམ་ཞིག་མཉམ་ཞུགས་གནང་ཡོད་འདུག
མཛད་རིམ་ལྟར་ན་སྨོན་ལམ་ཉིན་གྲངས་གསུམ་གྱི་རིང་ལ་ཚོགས་ཀྱི་ཡོད་པ་དང་། དེ་རིང་ཉིན་གང་སྨོན་ལམ་གསུངས་རྒྱུ། སང་ཉིན་སྔ་དྲོར་༸སྐྱབས་མགོན་༸གོང་མ་མཆོག་ལ་བརྟན་བཞུགས་ཕུལ་རྒྱུ། གནང་ཉིན་མི་མང་ལ་ཚེ་དབང་བཅས་ཡོད་པ་མ་ཚད། ནུབ་ཕྱོགས་སུ་ལས་བྲེལ་ཆེ་བའི་འཚོ་བའི་ཁྲོད་ནས་ཀུན་གྱི་སེམས་ལ་ཆོས་ཀྱི་ངལ་གསོ་ཞིག་ཐོབ་ཕྱིར་དང་། དགེ་རྩ་རླབས་ཆེན་ཞིག་བསགས་ཆེད་དུ་དམིགས་ནས་རིན་མེད་ཀྱི་ཐོག་ནས་གོ་སྒྲིག་ཞུས་ཡོད་འདུག
ཡུ་རོབ་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཚོགས་པ་ནི་ས་གནས་བྷེལ་ཇམ་ནང་དུ་གཞུང་འབྲེལ་དེབ་བསྐྱེལ་བྱས་ཟིན་པའི་ཚོགས་པ་ཞིག་ཡིན་པ་མ་ཚད། ཡུ་རོབ་ཕྱོགས་ཀྱི་དཔལ་ལྡན་ས་སྐྱ་པའི་ཆོས་བརྒྱུད་འཛིན་པའི་བརྩེ་ཆེན་ཚོགས་པ་ཁག་དང་། ཆོས་ཚོགས་རྣམས་ཀྱི་དབར་གོ་སྡུར་རིམ་པ་བྱུང་མཐར་དབུས་སྨོན་ལམ་ཚོགས་པ་རྒྱུད་ནས་སྙན་སེང་ཞུས་དོན་བཞིན། ངེས་དོན་ཆོས་ཀྱི་རྒྱལ་པོ་དཔལ་ས་སྐྱའི་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། དཔལ་ས་སྐྱའི་༧སྐྱབས་མགོན་༧གོང་མ་ཁྲི་འཛིན་རིན་པོ་ཆེ་རྣམ་གཉིས་ཀྱི་རྨད་དུ་བྱུང་བའི་ཐུགས་རྗེ་དང་འཕྲིན་ལས་ཀྱི་བདག་ཉིད་དང་། ངེད་ཅག་གི་བསོད་ནམས་ཀྱི་སྟོབས་ལས་ཕྱི་ལོ་ ༢༠༡༨ ལོར་དབུས་བརྙེས་པ་ཞིག་ཡིན་འདུག
Leave a comment